ಆಶೆಯ ಎಳೆಗಾಗಿ...

ನಿಜ,
ಚೀತ್ಕರಿಸುತ್ತಿದೆ ನವಿಲು
ಕುಣಿಯಲಾರದು ಅದು ಇನ್ನು
ಗರಿಗಳೆಲ್ಲ ಕಳಚಿಬಿದ್ದು
ನೃತ್ಯಕ್ಕೂ ಸಂಚಕಾರ

ಎಲ್ಲವೂ ಇಲ್ಲಿ ಬಯಲು
ಅಸಹ್ಯ ಹುಟ್ಟಿಸುವ ಬೆತ್ತಲು
ನಿಜಾಯಿತಿಯ ಎದೆಗೆ ಚೂರಿ

ಈ ಭೀಕರತೆಯಲ್ಲೇ
ನನ್ನ ಉಡಿಯಲ್ಲಿ ನೀನು
ನಿನ್ನ ಉಡಿಯಲ್ಲಿ ನಾನು
ದೂರದಲ್ಲೆಲ್ಲೋ ಪುಟ್ಟ ಮಗು
ಹಸಿಹಸಿ ಯೋನಿಯಿಂದ ಜಾರಿಬಿದ್ದು
ಕೇಕೆ ಹಾಕಿ ನಗುತ್ತದೆ

ನಿನ್ನೆವರೆಗೆ ತುಂಬಿದ್ದ
ಹಿತ್ತಲ ಬಾವಿಯಲ್ಲೀಗ ನೀರಿಲ್ಲ
ಇಣುಕಿ ನೋಡಿದರೆ
ನನ್ನ, ನಿನ್ನ ಮುಖ ಕಾಣುವುದೂ ಇಲ್ಲ

ಬಣ್ಣ ತುಂಬುತ್ತೇವೆ ನಾವು
ಮುರಿದುಬಿದ್ದ ಕ್ಯಾನ್‌ವಾಸಿನ ಮೇಲೆ
ಬಣ್ಣವಲ್ಲದ ಬಣ್ಣಗಳ ಬಳಸಿ
ಏನು? ಆಕಾಶಕ್ಕೇನು ಬಣ್ಣವಿದೆಯೆ?

ಹೋಗು, ಜಗುಲಿಯಲ್ಲಿ ನಿಂತಿದ್ದಾನೆ
ಬುಡುಬುಡುಕಿಯವನು
ಕಿವಿಗೊಡು ಅವನ ಜವಾಬುಗಳಿಗೆ
ಕೊಡು ಅವನಿಗೆ ವಸ್ತ್ರ, ಪುಡಿಗಾಸು, ಅಕ್ಕಿ

ಒಂದು ಆಶೆಯ ಎಳೆಗಾಗಿ
ಅಕ್ಕಿಯೇನು, ವಸ್ತ್ರವೇನು
ಹರಿದು ಕೊಟ್ಟುಬಿಡೋಣ
ನಮ್ಮದೇ ಮೂಳೆಮಾಂಸವ